Kryeministri i Kosovës, Albin Kurti, ka publikuar një mesazh me rastin e përfundimit të vitit 2024 dhe të fillimit të vitit të ri 2025. Në fjalën e tij, Kurti ka vlerësuar arritjet e rëndësishme të Kosovës gjatë vitit që lamë pas, duke përfshirë liberalizimin e vizave, forcimin e pasaportës kosovare dhe vlerësimin e parë kreditor nga agjencia amerikane Fitch Ratings, që ka cilësuar perspektivën financiare të Kosovës si stabile.
“Që nga 1 janari i këtij viti, kemi nisur ta shijojmë lirinë që e meritojmë – liberalizimin e vizave. Afërsia jonë me Evropën është bërë konkrete dhe funksionale, ndërsa pasaporta jonë është më e fuqishme se kurrë,” deklaroi Kurti. Ai theksoi se pasaporta e Kosovës është njohur nga Spanja dhe Armenia, duke e renditur Kosovën ndër vendet me përmirësimin më të madh në indeksin ndërkombëtar të pasaportave.
Kryeministri u ndal gjithashtu te progresi i brendshëm, duke përmendur fillimin e pagesës së energjisë në komunat veriore pas dy dekadash, përfundimin e procesit të konvertimit të patentë-shoferëve në veri dhe mbylljen e strukturave ilegale. “Sheshet në veri janë bërë hapësira të lira dhe dinamike, që bashkohen me gjithë Kosovën,” tha Kurti.
Mes arritjeve të tjera, Kurti përmendi rritjen e pensioneve me 20%, rritjen e pagës minimale pas 13 vitesh dhe uljen e çmimeve të mbi 2,900 barnave duke nisur nga 1 shkurti 2025. Ai theksoi përkushtimin e qeverisë për të vazhduar mbështetjen sociale dhe zhvillimin ekonomik.
Kurti foli edhe për sfidat e furnizimit me energji elektrike, duke fajësuar mungesën e investimeve të dekadave të kaluara, por duke garantuar angazhim maksimal për përmirësimin e rrjetit dhe forcimin e sigurisë energjetike përmes projekteve madhore si investimi 236.7 milionë dollarësh i MCC-së dhe burimet e reja të energjisë së rinovueshme.
“Viti 2025 është një mundësi e re për ta vazhduar rrugën e zhvillimit. E mbyllim këtë vit me përkushtim të plotë dhe hyjmë mbarë në të ardhmen. Gëzuar Viti i Ri 2025 të gjithë qytetarëve të Kosovës dhe familjeve tuaja,” përfundoi Kurti. /Kosovatimes/
