262 972 persona u bënë pjesë e vizitave turistike në Kalanë e Gjirokastrës gjatë vitit 2024 duke bërë që kjo kala të jetë më e vizituara ndër kalatë e vendit. Sipas statistikave, Kalaja e Gjirokastrës përgjatë 2024-ës pati 20,73% më shumë vizitorë se në vitin 2023.
Drejtoria Rajonale e Trashëgimisë Kulturore Gjirokastër ndërsa ndau shifrat nëpërmjet rrjeteve sociale, ftoi të vizitohet ky monument kulture për të ndarë eksperiencën e të njohurit të historisë e kulturës ndërthurur me pamjen e mrekullueshme që kalaja ofron edhe për këtë vit të ri.
Kalaja është e lidhur ngushtë me qytetin e Gjirokastrës dhe përmendet për herë të parë si qytet dhe kështjellë në vitin 1336.
Megjithatë historianë të ndryshëm mendojnë së ekzistenca e Kalasë së gurtë është më e hershme. Kulmin e historisë së saj kjo kështjellë do ta kishte në periudhën e Pashallëkut të Janinës, kur Ali Pashë Tepelena do të realizonte një sërë ndërtimesh të reja apo ndërhyrje të tjera, duke i dhënë Kalasë së Gjirokastrës fizionominë arkitektonike dhe ndërtimore që ka sot.
Kalaja e gurtë është një prej pikave më tërheqëse në guidat e grupeve turistike vendase dhe të huaja që vizitojnë Gjirokastrën e mbrojtur nga UNESCO.
