Presidenti i zgjedhur Donald Trump foli sot nga rezidenca e tij në Mar-a-Lago, Florida dhe iu përgjigj pyetjeve të gazetarëve.
“A mund t’i jepni një garanci botës se nuk do të përdorni forcë ekonomike apo ushtarake ndërsa përpiqeni të merrni kontrollin e këtyre zonave?” e pyeti gazetari.
“Jo”, u përgjigj shkurt Trump. Deklarata e tij e papritur vjen dy javë përpara se ai të rihyjë në Shtëpinë e Bardhë më 20 janar.
“Kanali i Panamasë u ndërtua për ushtrinë”
“A mund të na tregoni pak më shumë se cili është plani juaj? A do të negocioni një marrëveshje të re? A do t’u kërkoni kanadezëve të mbajnë një votim? Cila është strategjia?” vazhdoi gazetari.
“Unë nuk mund t’ju garantoj. Ju po flisni për Panamanë dhe Grenlandën. Unë nuk mund t’ju garantoj për to. Por mund të them se ne kemi nevojë për to për sigurinë ekonomike. Kanali i Panamasë është ndërtuar për ushtrinë,” tha Trump. .
“Unë nuk do të angazhohem për këtë,” përsëriti ai, kur u pyet nëse do të përjashtonte përdorimin e ushtrisë. “Mund të na duhet të bëjmë diçka. Kanali i Panamasë është jetik për vendin tonë. Ai menaxhohet nga Kina. Ne ia dhamë Kanalin e Panamasë Panamasë, nuk ia dhamë Kinës”, theksoi ai.
Kanali i Panamasë është një rrugë ujore që lidh oqeanin Atlantik dhe Paqësor dhe është ndërtuar nga SHBA në fillim të shekullit të 20-të. Kanali iu dorëzua Panamasë në vitin 1999 sipas një kontrate të vitit 1977.
Planifikimi i zgjerimit territorial?
Trump ka shkaktuar polemika javët e fundit me propozimet e tij për zgjerimin territorial të SHBA-së.
Kështu ai ringjalli idenë e tij të mëparshme për blerjen e Grenlandës, kërcënoi se do të merrte kontrollin e Kanalit të Panamasë dhe madje propozoi aneksimin e Kanadasë në SHBA, duke e përshkruar deri vonë kryeministrin kanadez Justin Trudeau si “Guvernatori i Shtetit të Madh të Kanadasë”.
Kryeministri i Groenlandës, Múte Bourup Egede, tha së fundmi se “Grenlanda nuk është në shitje dhe nuk do të jetë kurrë”, ndërsa qeveria daneze shprehu gatishmërinë për të bashkëpunuar me administratën e re amerikane, por pa lëshime në lidhje me territorin. Trump më pas përsëriti rëndësinë e Grenlandës për sigurinë kombëtare të SHBA-së, duke e quajtur pronësinë e ishullit një “domosdoshmëri absolute”.
Trump tha gjithashtu se do të kërkonte kthimin e Kanalit të Panamasë nën kontrollin e SHBA-së nëse Panamaja nuk ul kostot për anijet amerikane. Presidenti panamez José Raúl Mulino e hodhi poshtë këtë mundësi, duke theksuar se “çdo metër katror i kanalit i përket Panamasë”.
Trump u përgjigj në rrjetet sociale, duke postuar një foto të një flamuri amerikan mbi kanal me mesazhin: “Mirë se erdhe në kanalin e Shteteve të Bashkuara!”
