Presidenti i sapozgjedhur i SHBA-së, Donald Trump tha se tani janë duke u zhvilluar përgatitjet për takimin e tij me presidentin rus Vladimir Putin. Trump nuk specifikoi se kur mund të zhvillohet takimi.
“Ai dëshiron të takohem dhe ne po bëjmë përgatitjet”, tha presidenti i zgjedhur i SHBA-së, duke iu përgjigjur pyetjeve të gazetarëve. Trump shtoi se Putini kishte shprehur dëshirën e tij për t’u takuar publikisht.
“Ne duhet t’i japim fund kësaj lufte. Është një rrëmujë e përgjakshme,” u tha Trump gazetarëve përpara se të takohej me guvernatorët republikanë në rezidencën e tij Mar-a-Lago në Florida.
Presidenti i zgjedhur i SHBA-së nuk bëri të ditur detajet e takimit të ardhshëm, duke thënë se ai “do të preferonte të priste deri më 20 [janar]”, ditën e inaugurimit të tij.
Kremlini nuk e ka komentuar ende deklaratën e Trump.
Një ditë më parë, sekretari i shtypit i presidentit rus, Dmitry Peskov, tha se Putin mirëpret dëshirën e Trump për të vendosur kontakte, por deri më tani Kremlini nuk ka marrë asnjë kërkesë zyrtare. Sipas Peskov, do të ishte më e përshtatshme të pritej derisa Trump të marrë detyrën.
Presidenti i zgjedhur i SHBA-së u ka thënë vazhdimisht gazetarëve se ai po “punon aktivisht” për t’i dhënë fund luftës në Ukrainë. Përpara fitores së tij në zgjedhje, Trump premtoi ta bënte këtë “brenda 24 orëve” dhe madje edhe para inaugurimit të tij në janar, por nuk dha asnjë detaj. Më 7 janar, në një konferencë për shtyp në Florida, Trump tha se shpresonte t’i jepte fund armiqësive midis dy vendeve brenda gjashtë muajve.
“Ndoshta pak më herët. Rusia po humbet shumë të rinj, e njëjta gjë me Ukrainën. Kjo nuk duhej të kishte filluar fare. Një luftë e tillë nuk duhej të ndodhte fare”, tha presidenti i zgjedhur.
Presidenti ukrainas Volodymyr Zelensky tha më parë se Trump mund të luajë një rol vendimtar në rezultatin e luftës 34-mujore me Rusinë dhe të ndihmojë në ndalimin e Putinit. Megjithatë, në Kiev ata kanë frikë se një marrëveshje e shpejtë paqeje mund t’i kushtojë shumë Ukrainës.
Keith Kellogg, i nominuar për postin e të dërguarit special për Ukrainën dhe Rusinë, tha se Donald Trump nuk ka ndërmend të bëjë lëshime ndaj Kremlinit, por, përkundrazi, kërkon të mbrojë Ukrainën.
“Ajo që ai me të vërtetë po përpiqet të bëjë është të shpëtojë Ukrainën dhe sovranitetin e saj,” tha Kellogg . Sipas mendimit të tij, Trump është në gjendje të ofrojë një zgjidhje të pranueshme për t’i dhënë fund luftës në të ardhmen e afërt. I dërguari special beson se periudha mund të caktohet në 100 ditë.
