Përkatësisht, Brnabiq është përfaqësuesja e vetme e një shteti evropian në këtë inaugurim, i cili po bojkotohet nga një numër i madh i liderëve botërorë.
Ish-kryeministrja e Serbisë ka mbërritur në Karakas, kryeqytetin e Venezuelës, si përfaqësuese e presidentit të këtij vendi, Aleksandar Vuçiq, e shoqëruar nga diktatorë.
Më saktësisht, bëhet fjalë për liderët e Kubës dhe Nikaraguas, Miguel Díaz-Canel dhe Daniel Ortega. Përveç tyre, kishte edhe përfaqësues të dërguar nga Xi Jinping, lideri autoritar i Kinës dhe Vladimir Putin, presidenti i Rusisë.
Lista e vendeve që bojkotuan këtë inaugurim është shumë më e gjatë, ku përfshihen vendet e Bashkimit Evropian, SHBA-të, por edhe disa vende që ndajnë kufirin me Venezuelën, si Brazili dhe Kolumbia.
Në inaugurim nuk kishte përfaqësues të Argjentinës dhe Kilit, udhëheqësit e të cilëve e quajtën Maduro diktator.
Arsyeja e këtij bojkoti është fakti se shumë organizata ndërkombëtare kanë vlerësuar se Maduro i fitoi zgjedhjet në mënyrë të padrejtë dhe se fituesi i vërtetë ishte lideri i opozitës Edmundo Gonzalez.
Le të kujtojmë se Maduro pasoi ish-udhëheqësin e “padiskutueshëm” të Venezuelës, Hugo Chavez, dhe mbretërimet e tyre janë shënuar nga shkelje të të drejtave të njeriut, represion dhe shtypje të lirive të medias dhe civile.
