Kandidati për kryeministër nga Partia Demokratike e Kosovës (PDK), Bedri Hamza, ka vizituar sot fshatin Reçak, në prag të përvjetorit të Masakrës së Reçakut.
Gjatë takimit me banorët, Hamza kujtoi 15 janarin e vitit 1999 si një moment historik që tronditi ndërgjegjen botërore dhe ngriti zërin për drejtësi.
“15 janari ishte një thirrje zgjimi për ndërgjegjen botërore dhe mbetet një kujtesë e përhershme e nevojës për drejtësi. Sot, kjo datë na thërret të mos harrojmë, por të punojmë për një të ardhme më të mirë,” u shpreh Hamza.
Gjatë takimit, Hamza diskutoi me banorët për çështje të rëndësishme si drejtësia, ekonomia, shëndetësia dhe arsimi. Ai theksoi se programi i tij nuk është vetëm një premtim për të ardhmen, por një ftesë për qytetarët që të besojnë në veten e tyre dhe potencialin e vendit.
“Programi im është një kambanë që fton çdo qytetar të besojë në forcën e tij dhe në mundësitë që vendi ynë ofron. Është një ftesë për t’u bashkuar që ta bëjmë Kosovën më të mirë,” deklaroi Hamza.
