Partitë që përfaqësojnë pakicat në Mal të Zi po kërkojnë shkarkimin e kryetarit të Kuvendit të Malit të Zi Andrije Mandiq dhe nëse kjo nuk ndodh, kërcënojnë të largohen nga qeveria, shkruan gazeta CdM.
Ndër të tjera kontestohet edhe urimi i dërguar nga Mandiq për ditën antikushtetuese të Republikës Srpska.
Siç thonë ata, lëvizje të tilla “shkaktojnë përçarje dhe dëmtojnë marrëdhëniet me fqinjët”, prandaj këto parti, përfshirë Partinë Boshnjake, mund të largohen nga qeveria e drejtuar nga Milojko Spajiq.
Sipas informacioneve të CdM-së, aktualisht janë duke punuar për “përcaktimin e një pozicioni të qartë”, dhe janë planifikuar takime me kryeministrin Spajiq dhe ambasadorët e shteteve të Kuintit (SHBA, Britania e Madhe, Italia, Franca dhe Gjermania).
Ndërkohë që Mandiq do të jetë padyshim subjekt i kësaj nisme, anëtarët e tjerë të ish-Frontit Demokratik që tani janë ministra në qeverinë e Spajiqit nuk janë në rrezik.
Kujtojmë se sipas rindërtimit të qeverisë në vitin 2024, në pushtet erdhën Partia Boshnjake, DNP dhe NSD. Nëse partitë shqiptare dhe ajo boshnjake do të largoheshin nga ky koalicion, qeveria e Spajiqit nuk do të kishte më shumicën në parlamentin malazez.
