Kryetari i LDK-së, Lumir Abdixhiku, zhvilloi një takim entuziast me strukturat dhe simpatizantët e Degës 5 të LDK-së në Hajvali, Prishtinë, duke e cilësuar këtë moment si dridhje elektorale për Gollakun dhe gjithë Kryeqytetin.
Abdixhiku theksoi se asnjë alternativë tjetër politike nuk ofron për Prishtinën atë që LDK ka përgatitur për qytetarët e saj. Ai nënvizoi se prishtinasit, ashtu si katër vite më parë, kërkojnë ndryshim, këtë herë edhe në nivel nacional.
“LDK dhe Prishtina më 9 shkurt bëhen një,” tha Abdixhiku, duke shtuar se fushata elektorale e LDK-së është kthyer në një festë që shërben si antidot ndaj urrejtjes, përçarjes dhe ndarjes politike.
Abdixhiku prezantoi një plan ambicioz për transformimin e Kryeqytetit, i cili përfshin:
1.5 miliard euro investime për Prishtinën
Realizimin e projektit të Unazës së Kryeqytetit
Ndërtimin e Stadiumit të Ri dhe Qendrës së Sportit
Krijimin e një Parku Teknologjik
Ndërtimin e Spitalit të Ri
Zbatimin e mësimit tërëditor për 28 mijë fëmijë në Kosovë
“Prishtina dhe banorët e saj më 9 shkurt do të fitojnë shtetin që i ka bllokuar për katër vite rresht,” deklaroi Abdixhiku.
Ai falënderoi dy kandidatët e Degës 5, Izetin dhe Fikneten, për organizimin e suksesshëm të eventit dhe përkushtimin e tyre në këtë fushatë.
“Na jepni besim dhe shpresë. Kjo është fushata jonë e shpresës dhe ndryshimit,” përfundoi ai. /Kosovatimes/
