Lideri i Lidhjes Demokratike të Kosovës (LDK), Lumir Abdixhiku, ka mbajtur një tubim të jashtëzakonshëm në Luginën e Baranit, duke theksuar një frymë të re bashkimi mes LDK-së dhe popullit. Në një atmosferë entuziaste dhe përplot emocione, Abdixhiku deklaroi se partia po përjeton një ringritje të qartë dhe të fuqishme.
“Ky nuk është tubimi qendror në Pejë, është vetëm Lugu i Baranit! E kuptoni tani kur themi se LDK dhe populli janë bërë tashmë një? Si dikur, sikurse tani!” – tha Abdixhiku, duke u bërë thirrje qytetarëve që të vazhdojnë mbështetjen për LDK-në, të cilën e cilësoi si një parti të rilindur dhe të përkushtuar për ndryshim.
Lideri i LDK-së theksoi se në Dukagjin ka gjetur një përkrahje të jashtëzakonshme dhe se fitorja është e pashmangshme. “Dukagjinçe sot kërkova të flisnit, dukagjinçe u tha: ndryshimi po vjen!” – deklaroi ai, duke paralajmëruar një “tërmet të djathtë” në tubimin qendror që do të mbahet në Karagaç më 26 janar.
Me këtë energji dhe mbështetje të madhe, LDK synon të shndërrohet në forcën kryesore politike në zgjedhjet e ardhshme duke premtuar ndryshime të thella dhe të qëndrueshme në vend. /Kosovatimes/
