Policia e Kosovës ka njoftuar se sot qytetari H. Gashi, 56 vjeç, nga Kaçaniku, ka gjetur një shumë të caktuar parash në një restorant në Han të Elezit. Sipas njoftimit, menjëherë pas gjetjes, ai ka dorëzuar paratë në stacionin e policisë në Han të Elezit.
Policia ka bërë të ditur se rreth një orë më vonë, përmes kamerave të sigurisë policët kanë arritur të identifikojnë personin V. B., të cilit i kanë humbur paratë dhe e kanë ftuar në stacionin e policisë.
“Pas kryerjes së procedurave të verifikimit, paratë, që rezultuan të jenë 150 euro, i janë kthyer personit V.B. Drejtoria Rajonale e Policisë në Ferizaj falënderon qytetarin H. Gashi për gjestin e tij human dhe shembullor, duke treguar një standard të lartë të përgjegjësisë qytetare dhe bashkëpunimit me policinë”, thekson njoftimi i policisë. /Kosovatimes/
