Shkruan: Florim ZEQA
Sa ikin vitet, shtohet malli dhe krenaria për presidentin historik, rritet respekti dhe ndjenja e krenarisë kombëtare. Kujtimi për Ibrahim Rugovën na bën sa të fortë po aq të vendosur për të vazhduar rrugën e trasuar nga Ai.
Veprat e tij i kemi kudo dhe kahdo në mesin tonë
Me presidentin Rugova, bota e civilizuar dhe demokratike, na njohu si popull liridashës, të urtë dhe paqësor, të përkushtuar ndaj vlerave të civilizimit, me besim të fuqishëm në Zot dhe Atdhe.
Me veprën e tij madhore, atë të rezistencës aktive paqësore, si askush më parë në historinë e popullit shqiptar, si misionar dhe vizionar, i dha nder dhe vlerë kombit tonë, shqiptarëve të Kosovës në veçanti.
Përjetësisht i jemi mirënjohës shpëtimtarit të qenies sonë kombëtare, atit themeltar të shtetit tonë, presidentit historik Ibrahim Rugova.
Është shkruar e thënë shumë për këto 19 vite të shkuarjes në amshim të presidentit historik Ibrahim Rugova, por gjithmonë fjalët mbesin të varfra për të shprehur gjithë atë çfarë e meriton të thuhet për shpëtimtarin e qenies sonë kombëtare.
Më mirë se çdo varg, më mirë se çdo poezi dhe më mirë se çdo shkrim flasin veprat e tij kudo dhe kahdo në mesin tonë.
Politikanët e sotëm, të të gjitha llojeve e ngjyrave, jo vetëm që nuk mundën të dalin jashtë projektit Rugovian, po e kanë të vështirë të qëndrojnë vertikalisht në të njëjtët binar siç qëndroj Ai, të pavarësisë së Kosovës!
Bekimi i tij i vazhdueshëm për njohjen formale ndërkombëtare të shtetit të Kosovës u bë realitet më 17 shkurt 2008-të, kur bota demokratike e dha sinjalin e njohjes së pavarësisë së Kosovës.
Rugova na la shtetin amanet
Edhe pse presidenti iku në përjetësi para kësaj date, Ai na la shtetin e Kosovës në miqësi të përjetshme më SHBA-të, si garantuesin më të fuqishëm të pavarësisë dhe të ekzistencës së shtetit tonë dhe në miqësi me shtetet më të fuqishme të Bashkimit Evropian.
Themelet e forta të shtetit të Kosovës, të, cilat Rugova i ndërtoj për afro një dekadë përmes rezistencës aktive paqësore, sfidat e panumërta të popullit dhe gjaku i derdhur për liri në luftën e fundit çlirimtare janë gurthemel i fortë i shtetit të Kosovës.
Së paku edhe për 100 vjetët e ardhshme nuk do të ketë ide apo formulë tjetër më të saktë sesa ajo e Rugovës për ecjen dhe zhvillimin e shtetit të Kosovës.
Projektet e Rugovës për; Ushtrinë e Kosovës, funksionimi i rendit dhe ligjit, për shëndetësi moderne, arsim cilësor, infrastrukturë rrugore (autostrada), për krijimin e vendeve të punës për të rinjtë dhe shumë projekte të fushave të ndryshme jetike për vendin, ishin dhe do të jenë udhërrëfyes i shumë qeverive të ardhshme të Kosovës.
Engjëlli ynë, shpëtimtari i qenies sonë kombëtare, le të pushon i qetë në parajsën e tij, pasi i realizoj të gjitha premtimet dhe i përmbushi të gjitha obligimet ndaj atdheut dhe popullit të vet.
Sa më fat paskeni qenë president që u ngritët lartë në qiell, për të mos përjetuar devijimet dhe deformimet e kësaj kohe të keqe në të cilën po jetojmë, ku vlerat u zëvëndësuan më antivlera, morali më imoralitet, drejtësia më padrejtësi dhe besa me tradhti.
Ne që sot ballafaqohemi me sfidat e kësaj kohe të keqe na mbanë gjallë ndjenja e krenarisë që jetuam dhe vepruam në epokën e tij, në epokën e krenarisë kombëtare.
Lavdi e përjetshme jetës dhe veprës madhore të presidentit historik Ibrahim Rugova!
