Palestra sportive “Jeton Terstena TOTA” në Vushtrri u mbush mbrëmë nga mijëra mbështetës të Lidhjes Demokratike të Kosovës (LDK), duke shënuar një ngjarje të jashtëzakonshme me liderin e partisë, Lumir Abdixhiku.
Në këtë tubim të fuqishëm, që përkoi me përvjetorin e lindjes së Ibrahim Rugovës, Abdixhiku ritheksoi përkushtimin e tij për miqësinë e përhershme me Shtetet e Bashkuara të Amerikës. Ai premtoi se vizita e tij e parë si kryeministër do të jetë në SHBA dhe kërkesa e tij e parë do të jetë që Kampi Bondsteel të bëhet i përhershëm në Kosovë.
“Kosova shtet i pavarur dhe sovran, i anëtarësuar në NATO dhe Bashkimin Evropian, me miqësi të përhershme me SHBA-të – ky është misioni ynë dje, sot dhe nesër,” deklaroi Abdixhiku.
Duke cituar fjalët e Ibrahim Rugovës, “Shtëpia nuk mbahet pa miq,” lideri i LDK-së theksoi se lidhja e Kosovës me SHBA-të është themeli i suksesit dhe sovranitetit të vendit.
Abdixhiku shprehu optimizëm për të ardhmen, duke thënë: “Koha jonë po vjen, ndryshimi është afër!”
Tubimi u përmbyll me një entuziazëm të jashtëzakonshëm, duke i dhënë një mesazh të qartë: LDK-ja është gati për t’u rikthyer në pushtet. /Kosovatimes/
