“Ditët Historike të shënuara me gjak, nderohen duke dhuruar gjak”, është motoja e banorëve të vendlindjes së heroit Zahir Pajaziti, të cilët do të organizojnë dhurimin e gjakut. Kjo nismë organizohet për nder të 28 vjetorit të rënies së tre heronjve të kombit , Zahir Pajaziti, Hakif Zejnullahu dhe Edmond Hoxha. Këshilli organizativ i fshatit Orllan, me këtë rast ka ftuar gjithë qytetarë në nivel vendi të jenë pjesë e aktivitetit për nder të heronjve. Të premten më 31 janar nga ora 10 deri në orën 14.00 kulla e Zahir Pajazitit do ti hap dyert për të pritur qytetarët të cilët do të kenë mundësinë të dhurojnë gjak për të nderuar heronjtë.
Më 31 janar 1997 ndodhi njëra nga betejat e para madhore të pjesëtarëve të Ushtrisë Çlirimtare të Kosovës. Tre strategët, Zahir Pajaziti, Hakif Zejnullahu dhe Edmond Hoxha ishin duke udhëtuar nga Prishtina në drejtim të Vushtrrisë, derisa grupi i tyre zbulohet nga sigurimi serb, të cilët kishin vënë pritë në fshatin Pestovë, ku të tre bien heroikisht në luftë me ta./Kosovatimes
