Aleanca për Ardhmërinë e Kosovës e Nisma me partnerët e koalicionit kanë mbajtur tubim elektoral në Gjilan. Kandidati për kryeministër i këtij koalicioni, Ramush Haradinaj premtoi se në programin e tyre Gjilani do të bëhet qendër e fuqishme ekonomike e rajonit.
Haradinaj premtoi zgjerimin e autostradës deri te Dheu i Bardhë dhe përfundimin e punimeve në stadiumin e qytetit.
“Do ta sigurojmë Kosovën për shumë vjet. Për çështjen e NATO-s ka me pas ndonjë pengesë por jam optimist se do ta kalojmë këtë temë me sukses si dhe kam marrë premtime”, ka thënë Haradinaj.
Tutje ai ka thënë se do të investojnë në prodhimin energjetik dhe uljen e çmimit. Sipas tij, kjo do të realizohet duke u ngrohur me gaz, teksa ka thënë se realizimi i saj do t’i marrë këtij koalicioni dy vjet kohë.
Fatmir Limaj kandidati për deputet tha se ky koalicion përbëhet nga njerëz të fuqishëm që punojnë për Kosovën fituese.
“Është një ekip që ka brenda njerëz që kanë vepra, janë intelektual dhe këta do ta bëjnë ndryshimin në Anamoravë”, ka thënë ai.
Ndërsa Ahmet Isufi, kandidat për deputet duke kërkuar mbështetjen e bashkëqytetarëve tha se me 9 shkurt është koha për ata që e ndërtojnë Kosovën.
“Vendi është para një rruge që duhet të marr kahje tjetër me njerëz që e kanë sjell lirinë e pavarësinë, për ata që e bënë ushtrinë e me njerëzit që Kosovën do ta dërgojnë në NATO”, ka thënë Isufi.
Në këtë tubim elektoral në Gjilan janë prezantuar kandidatët për deputetë të kësaj komune.
