Presidenti i klubit Santos, Marcelo Teixeira, ka konfirmuar zyrtarisht rikthimin e Neymar në klubin ku e kishte nisur karrierën e tij.
Përmes një postimi në rrjetet sociale, Teixeira, ka njoftuar se pas largimit me mirëkuptim nga klubi saudit Al Hilal ylli brazilian ka firmosur një kontratë fillestare gjashtëmujore po me mundësi vazhdimi.
Neymar rikthehet për të udhëhequr Santos si lojtari kryesor në kthimin në Serie A të Brazilit. Neymar pritet të bëjë debutimin e tij me Santos më 5 shkurt, në ditëlindjen e tij të tridhjetë e tretë. Në atë ditë, Santos do të përballet me Botafogo në “Vila Belmiro”, në kuadër të raundit të shtatë të kampionatit Paulistao.
Pas transferimit te Al Hilal për një shifër prej nëntëdhjetë milionë eurosh në gusht të vitit 2023, Neymar kishte zhvilluar vetëm shtatë ndeshje zyrtare me ekipin saudit, duke realizuar një gol dhe duke dhënë dy asiste. Për shkak të mosbesimit nga trajneri Jorge Jesus, ai nuk ishte regjistruar për sezonin 2024/25 të Ligës Saudite dhe kishte luajtur vetëm dy ndeshje në Champions League të Azisë.
Neymar është një legjendë për klubin Santos. Gjatë periudhës së tij nga viti 2009 deri në 2013, ai kishte realizuar 136 gola dhe kishte dhënë gjashtëdhjetë e tre asiste në 225 ndeshje. Ai kishte ndihmuar klubin të fitojë gjashtë tituj, përfshirë Copa Libertadores në vitin 2011, Recopa Sudamericana në 2012, Kupën e Brazilit në 2010 dhe tre kampionate Paulistao (2010, 2011, 2012).
