Në një kryqëzim të zënë në qytetin japonez të Yashio, një vrimë e madhe u hap dje, duke gëlltitur kamionin dhe shoferin. Vrima, 10 metra e gjerë dhe 5 metra e thellë, u hap rreth orës 10 të mëngjesit me orën lokale.
“Ne besojmë se vrima u hap për shkak të një këputjeje në një tub ujërash të zeza të pellgut të lumit Nakagawa,” tha Motohiro Ono, guvernatori i prefekturës Saitama. Pavarësisht përpjekjeve të shpëtimtarëve, drejtuesi i mjetit është ende i bllokuar në kabinën e mbushur me rërë dhe baltë.
Ekipet e shpëtimit pompuan ajrin në vrimë për t’i dhënë shoferit oksigjen, raportoi Nippon TV. Ndërkohë, një gropë tjetër u hap jo shumë larg vrimës së parë. Autoritetet lokale u kanë bërë thirrje banorëve brenda një rrezeje prej 200 metrash që të evakuohen sepse një tubacion gazi kalon nën tokë.
Në fillim të operacionit të shpëtimit, drejtuesi i mjetit ishte në vetëdije dhe po komunikonte me ekipet e shpëtimit, por më vonë u shfaq informacioni se shpëtimtarët nuk mund të komunikonin më me drejtuesin e mjetit. Në vrimë ka mbetur vetëm kabina, ndërsa pjesa tjetër e mjetit është nxjerrë me sukses.
Ky nuk është incidenti i parë i tillë
Ka pasur disa incidente që përfshijnë gropat në Japoni vitet e fundit. Në shtator, një gropë u shfaq në Hiroshima pasi një tub uji nëntokësor shpërtheu dhe një rrugë u shemb. Disa persona të bllokuar në ndërtesa u shpëtuan nga zjarrfikësit.
Në vitin 2016, një tjetër gropë e madhe, 30 metra e gjerë dhe 15 metra e thellë, u shfaq papritur në Fukuoka dhe gëlltiti pesë korsi rrugore. Incidenti tërhoqi vëmendjen botërore pasi punëtorët japonezë riparuan rrugën brenda disa ditësh.
