Besiana Mehmedi të shtunën ka pasur një performancë fantastike, të cilën kemi pasur mundësi ta ndjekim live përmes Televizionit të Kosovës.
Koncerti nisi me monologun “35 vjet pa Ylfeten”, shkruar nga Besiana, mbi bazë të rrëfimeve të vërteta të familjarëve, gërshetuar me muzikë dhe balet nga koreografja Sabrie Spahiu. Pas kësaj pike tepër emocionale u interpretuan Himni i Kosovës dhe ai i Shqipërisë dhe u mbajt një minutë heshtje në nderim të figurës së heroinës e cila edhe pas 35 vjetësh mbahet mend si viktima ndërkombëtare që preku thellë ndërgjegjen e njerëzimit.
Besiana Mehmedi ka shkëlqyer me këngën dedikuar Ylfete Humollit dhe me këngën dedikuar të gjithë heronjve të kombit dhe UÇK-së. Paraqitja e saj u përcoll me ovacione dhe duartrokitje të pandalshme në teatrin e Podujevës. Gjatë moderimit u vu në pah ndikimi i Ylfetes në çështjen shqiptare, posaçërisht shkrimet në gazetën “Washington post”, kur Dejvif Bajnder kishte shkruar “Kur viktima të ngushëllon”, pas bisedave me babën Isë, i cili me krenari fliste për Ylfeten dhe gatishmërinë e tij që t’i falë gjithçka Kosovës, siç edhe ndodhi që në vitin 1999 të bie dëshmor djali i tij Mentori në betejën e Koshares.
Ishte dinjitoze paraqitja e profesoreshës nga Tirana, Rudina Ciko, e cila shkëlqeu me ekzekutimin e veprës “Qirinj në erë”, ku së bashku me Besiana Mehmedin sollën një moment historik, kur në Departamentin e Shtetit amerikan ishin paraqitur dëshmitë për vrasjen e Ylfetit e cila tronditi tërë Kosovën.
Në koncertin homazh morën pjesë edhe sopranoja e njohur Adelina Paloja, e cila, përveç pikave solistike, i është bashkangjitur në këtë rrugëtim artistes Besiana Mehmedi në duetet “Vendi im”, “Rrjedh në këngë e ligjërime” dhe “Valsi i lumturisë” si dëshirë e Ylfetes dhe gjithë dëshmorëve që përjetësisht jeta të lulëzojë dhe Kosova të gëzojë vetëm pranvera.
Programin e përcolli në piano Alba Muçoli, ndërkaq kontribut të madh në realizimin e koncertit dha maestro Zhani Ciko dhe u prit me nderimet më të larta në Podujevë, duke u ngritur e tërë salla në këmbë si përkulje për kontributin e tij në kulturën shqiptare dhe në këtë koncert homazh.
Në emër të familjes, Vlora Humolli, e cila është drejtoreshë në njërën nga drejtoritë e komunës së Podujevës, i falënderoi të pranishmit që mbajnë gjallë kujtimin për të. Ajo ftoi në skenë udhëheqësin artistik të kësaj ngjarje, Shkodran Tolaj, i cili në një kohë rekord ka bërë një punë të jashtëzakonshme e të nivelit të lartë artistik që e meriton Ylfetja dhe çdo dëshmor i lirisë.
