Kandidati për kryeministër nga koalicioni për Kosovën Fituese, Ramush Haradinaj, ka prezantuar sot para qytetarëve të Prishtinës programin zhvillimor, duke premtuar implementimin e plotë të Ligjit për Kryeqytetin dhe realizimin e projekteve kapitale që, sipas tij, do ta transformojnë metropolin e Kosovës.
“Me implementimin e plotë të Ligjit për Kryeqytetin, do t’i japim Prishtinës fuqinë që i takon”, u shpreh Haradinaj, duke shtuar se përfundimi i Unazës së Jashtme do të revolucionarizojë qarkullimin në kryeqytet.
Sipas tij, ndërtimi i stadiumit të ri dhe Sallës Koncertale do ta shndërrojnë Prishtinën në epiqendër të sportit dhe kulturës rajonale.
Tutje Haradinaj ka folur edhe për zhvillimin ekonomik, teksa ka thënë se parasheh rritje ekonomike deri në 7%, me paga mesatare mbi 1000 euro dhe pensione minimale prej 500 eurosh.
Haradinaj premtoi edhe uljen e çmimit të energjisë për 20% përmes rritjes së prodhimit vendor në 1500 MW.
Ai tha se nën qeverisjen e tij çdo student do të ketë bursë, pavarësisht universitetit, derisa premtoi pako prej 1 miliard eurosh për bizneset prodhuese-eksportuese, e që sipas tij, pritet të gjenerojë vende të reja pune.
Haradinaj në fund tha se anëtarësimi i drejtpërdrejtë në NATO dhe aleanca e përhershme me SHBA-të janë shtyllat kryesore për tërheqjen e investimeve të huaja dhe sigurimin e stabilitetit afatgjatë të vendit.
