Në kuadër të Këshillit të Evropës do të krijohet një gjykatë speciale për krimin e agresionit, njoftoi më 4 shkurt në Bruksel Sekretari i Përgjithshëm i Këshillit të Evropës Alain Berset.
“Ngritja e një Gjykate Speciale për Krimin e Agresionit brenda Këshillit të Evropës do t’i lejojë partnerët tanë ndërkombëtarë, veçanërisht Ukrainën dhe Bashkimin Evropian, të përdorin plotësisht përvojën dhe ekspertizën tonë në fushën e të drejtave të njeriut dhe sundimit të ligj në të gjithë kontinentin”, tha Berset në një konferencë në Bruksel. Grupi kryesor për krijimin e një gjykate për krimin e agresionit kundër Ukrainës përfshin 41 shtete, Komisionin Evropian, Shërbimin Evropian të Veprimit të Jashtëm dhe vetë Këshillin e Evropës.
Sipas burimeve të Deutsche Welle (DW), mbledhja e tanishme e nismëtarëve të gjykatës mund të jetë e parafundit dhe tjetra mund të mbahet në pranverë. Sipas të gjitha gjasave, aty do të nënshkruhet një dokument për krijimin e një gjykate speciale.
Për krimin e agresionit, të quajtur një nga krimet më të rënda, krerët e shtetit agresor dhe udhëheqja e tij ushtarake janë subjekt i dënimit. E pyetur nga DW se si mund të ndikojë krijimi i një gjykate ndërkombëtare në bisedimet e mundshme që presidenti amerikan Donald Trump synon të mbajë me presidentin rus Vladimir Putin, shefja e politikës së jashtme të BE-së Kaja Kallas tha: “Nuk ka dyshim se Putini ka kryer një krim agresioni. domethënë, ai vendosi të sulmojë një vend tjetër, për të cenuar sovranitetin dhe integritetin territorial të Ukrainës”.
Në një intervistë për Deutsche Welle, Kallas tha gjithashtu se puna e gjykatës është e nevojshme “për të sjellë përgjegjësit para drejtësisë dhe për të vendosur një paqe të drejtë në Ukrainë”.
- Rusia aneksoi Krimenë në vitin 2014 dhe mbështeti separatistët e armatosur në Donbass. Në vitin 2022, Moska nisi një pushtim në shkallë të plotë të Ukrainës, të cilin Kievi dhe Perëndimi, si shumica e vendeve të OKB-së, e karakterizuan si agresion të paprovokuar. Autoritetet ruse përmendën nevojën e të ashtuquajturit “denazifikimi” dhe “çmilitarizimi” i Ukrainës ndër qëllimet kryesore të luftës.
