Kandidati i Partisë Demokratike të Kosovës, Bedri Hamza, ka premtuar ndërtimin e termocentralit me gaz me një kapacitet prej 350 MË, krahas lidhjeve me tubacione nga Shqipëria dhe Maqedonia e Veriut. Thotë se investimet e përgjithshme për termocentralin dhe gazpërçuesit nga grantet, buxheti dhe sektori privat, do të arrijnë në 1 miliard euro gjatë mandatit të tij.
Sipas tij, Kosova ka nevojë për kapacitete të reja energjetike dhe për furnizim të qëndrueshëm me rrymë.
“Qytetarë të dashur për një të ardhme të pastër dhe të gjelbër me kosto jetese më të përballueshme, do të investojmë në diversifikimin energjetik. Ne, do të ndërtojmë termocentralin me gaz dhe do të fillojmë ta ndërtojmë edhe rrjetin e shpërndarjes dhe furnizimin me gaz natyror në tërë Kosovën. Termocentrali me gaz, do të ndërtohet me një kapacitet prej 350 MW, krahas lidhjeve me tubacione nga Shqipëria dhe Maqedonia e Veriut. Kosova, ka nevojë për kapacitete të reja energjetike dhe për një furnizim të qëndrueshëm me rrymë për çdo familje dhe për çdo biznes. Investimet e përgjithshme për termocentralin dhe gazpërçuesit nga grantet buxheti dhe sektori privat, do të arrijnë në 1 miliard euro gjatë mandatit tim, si kryeministër”, tha Hamza.
