Kandidati për kryeministër nga Lidhja Demokratike e Kosovës, Lumir Abdixhiku, thotë se ka marrë mbështetje për zgjedhjet e 9 shkurtit nga kryetari i Partive Popullore Evropiane, Manfred Weber. Kjo u bë e ditur nga vetë lideri i LDK-së që është pretendent për kryeministër, i cili publikoi videomesazhin mbështetës nga Weber.
“Nën udhëheqjen e tij, partia anëtare e EPP-së sonë, LDK-ja e ka ndërtuar një plan të qartë dhe ambicioz për gjeneratën e ardhshme , një plan për një ekonomi më të fortë, për krijimin e vendeve të punës, për një qeveri që i shërben popullit. Për një luftë të fortë kundër korrupsionit dhe për një të ardhme ku Kosova nuk stagnon, por ecë përpara”, thuhet ndër të tjera në mesazhin e Weber.
Abdixhiku, këtë mbështetje e quajti nderim, që sipas tij, vjen nga familja më e madhe politike e partiake në BE dhe Evropë.
“Presidentin e EPP-së, Manfred Weber, e falënderoj për mesazhin dhe mbështetjen e dhënë në këto zgjedhje historike për vendin tonë. E djathta po merr forcë rekorde në Evropë dhe botë, prandaj si vend, si Republikë, si shoqëri, duhet t’i kapim këto mundësi të jashtëzakonshme historike për vendin tonë. Kthimi nga rrugëtimi euroatlantik është akt patriotik sot. LDK, unë, dhe populli i Kosovës, do ta bëjmë këtë”, ka thënë Abdixhiku.
