Sekretari amerikan i Shtetit, Marco Rubio, tha se Donald Trump kishte sugjeruar vetëm që SHBA të marrë përgjegjësinë për rindërtimin e Gazës, jo të marrë kontrollin e përhershëm të zonës, raporton Guardian . Trump, në një deklaratë së bashku me Benjamin Netanyahun dje, bëri thirrje për zhvendosjen e përhershme të 2 milionë palestinezëve nga Gaza në vendet fqinje.
Rubio tha në një konferencë shtypi në Guatemala City sot se propozimi i Trump “nuk ishte menduar si një akt armiqësor”. “E vetmja gjë që Presidenti Trump ka bërë – që unë mendoj se është shumë bujare – është të shprehë gatishmërinë e Shteteve të Bashkuara për të ndërhyrë, për të hequr rrënojat, për të pastruar vendin nga të gjitha shkatërrimet… në mënyrë që njerëzit të kthehen më pas”, tha Rubio.
Ai shtoi se Trump dëshiron të mbështesë “rindërtimin e shtëpive dhe bizneseve në mënyrë që njerëzit të mund të kthehen”.
Rubio e përshkroi Gazën si “një zonë të ngjashme me një fatkeqësi natyrore”, ku njerëzit nuk mund të jetojnë për shkak të municioneve të pashpërthyera, rrënojave dhe mbeturinave. “Njerëzit padyshim do të duhet të jetojnë diku derisa Gaza të rindërtohet,” përfundoi ai.
