Presidenti i SHBA-së, Donald Trump, ka thënë se SHBA-ja do të “marrë Rripin e Gazës”, duke premtuar se do të rindërtojë vendin e shkatërruar nga lufta dhe do të rivendosë dy milionë palestinezë në vendet fqinje.
Ambasadori izraelit në OKB u tha mediave amerikane se ai mbështet marrjen e Rripit të Gazës nga Amerika, por ideja e zhvendosjes së detyruar nuk do të ishte e lehtë për t’u zbatuar.
“Unë mendoj se ne të gjithë biem dakord që kjo duhet të kërkojë pëlqimin, pëlqimin e njerëzve për t’u larguar nga vendi ku ata jetojnë dhe pëlqimin që vendet e tjera t’i marrin ata,” tha Danon.
Edhe pse ai nuk specifikoi se si SHBA do të merrte territorin e diskutueshëm, vendosja e trupave amerikane për të administruar territorin nuk u përjashtua. Edhe pse Netanyahu e vlerësoi planin, shumica e botës arabe e hodhi poshtë drejtpërdrejt ose tërthorazi këtë plan.
Danon nuk është i sigurt se si do të zbatohet plani i Trump dhe tha se palestinezët janë “të dënuar të qëndrojnë aty ku janë” nëse nuk dalin propozime të tjera, sepse Izraeli nuk do të lejojë Hamasin të mbajë pushtetin në Gaza.
“Nëse Hamasi qëndron atje, është vetëm çështje kohe para se të sulmojmë sërish Gazën”, tha ai.
Ministria e Jashtme e Arabisë Saudite kohët e fundit tha se kishte paralajmëruar SHBA-në për të drejtat palestineze dhe përsëriti se propozimi do të rrezikonte të gjitha marrëdhëniet e ardhshme diplomatike me Izraelin.
Vende të tjera arabe, si Jordania dhe Egjipti, kanë kundërshtuar me forcë përpjekjet e mëparshme të Trump për të zhvendosur me forcë popullsinë e Gazës.
