Kremlini ka shkarkuar kreun e agjencisë ruse të hapësirës, i cili kishte qenë në këtë pozicion për më pak se tre vjet, një mandat i shënuar nga dështimi spektakolar i misionit të parë të Rusisë në Hënë në 47 vjet.
Kremlini tha në një deklaratë se Yuri Borisov, i cili kishte drejtuar agjencinë Roskosmos që nga korriku 2022, ishte zëvendësuar nga Dmitry Bakanov, një zëvendësministër i transportit që drejtonte kompaninë satelitore Gonets përpara se të bashkohej me qeverinë.
Zëdhënësi i Putinit: Është një rotacion
Zëdhënësi i Kremlinit Dmitry Peskov tha më vonë se Kremlini nuk kishte ankesa për Borisovin dhe se shkarkimi i tij ishte një “rotacion”.
“Kjo korporatë duhet të zhvillohet në mënyrë dinamike, prandaj po ndodh rotacioni,” tha Peskov.
Që kur kozmonauti sovjetik Yuri Gagarin u bë njeriu i parë në hapësirë në vitin 1961, Rusia ka qenë një forcë udhëheqëse në eksplorimin e hapësirës.
Por ambiciet e saj pësuan një goditje të madhe në gusht të vitit 2023, kur misioni rus pa pilot Luna-23 u përplas me sipërfaqen hënore ndërsa po përpiqej të zbarkonte.
Pavarësisht nga kjo pengesë, Borisov paraqiti plane ambicioze për vitet e ardhshme, ndërsa Rusia përgatitet të nisë stacionin e saj hapësinor.
Projekti i ri do të zëvendësojë Stacionin e vjetër Ndërkombëtar Hapësinor (ISS), ku Rusia ka punuar ngushtë me Shtetet e Bashkuara edhe pasi marrëdhëniet e tyre u përkeqësuan në mënyrë kritike për shkak të luftës në Ukrainë.
Borisov vitin e kaluar miratoi një afat kohor sipas të cilit dy modulet e para të stacionit të ri rus do të niseshin në vitin 2027.
Rusia ka thënë se synon të mbajë një prani të vazhdueshme të ekuipazhit në hapësirë dhe të kryejë projekte shkencore, ekonomike dhe të sigurisë që nuk janë të mundshme në pjesën ruse të ISS.
Konkurrenca mes fuqive botërore
Fuqitë botërore po konkurrojnë jo vetëm për të eksploruar hapësirën, por edhe për të vendosur potencialisht armë atje.
Me afrimin e vitit 2026, kur skadon marrëveshja e fundit midis Rusisë dhe SHBA-së për të kufizuar numrin e armëve të tyre bërthamore, të dy vendet kanë akuzuar njëri-tjetrin për plane për një garë armësh hapësinore.
Borisov ishte më parë zëvendësministër i Mbrojtjes i Sergei Shoigu, të cilin presidenti Vladimir Putin e zëvendësoi vitin e kaluar dhe i dha atij një rol të ri si sekretar i Këshillit të Sigurimit Rus.
Bakanov më parë drejtonte kompaninë Gonec, e cila operon një sistem komunikimi satelitor rus të ngjashëm me amerikanin Starlink, por dukshëm më i vogël dhe i përdorur kryesisht për qëllime qeveritare.
Kompania ishte një partner rus në OneWeb, një projekt global komunikimi satelitor.
Rusia synonte të merrte pjesë aktive në OneWeb, por u tërhoq në vitin 2018 kur shërbimi i inteligjencës FSB tha se projekti përbënte një kërcënim për sigurinë kombëtare.
