Kryeministri i Shqipërisë, Edi Rama, ka marrë pjesë në një tryezë diskutimi të organizuar nga Banka e Shqipërisë, ku u bë e ditur një iniciativë e re financiare për mbështetje të investimeve në sektorin e bujqësisë.
Rama, në një postim në Facebook ka njoftuar se, përmes një linjë financimi, Banka e Shqipërisë, do të ndihmojë me 250 milionë euro bujqësinë dhe sipërmarrjen në fshat.
“Përmes një instrumenti bankar novator, me një linjë financimi prej 250 milionë euro, do të rrisim aksesin për kredi të buta për një nga sektorët prioritarë. Me qeverinë si garante, do të mbështeten investimet në sera, agropërpunim, peshkim, akuakulturë, agroturizëm, inovacion teknologjik në shërbim të zhvillimit rural”, ka shkruar Rama në Facebook.
