Kandidati për kryeministër i Aleancës për Ardhmërinë e Kosovës, Ramush Haradinaj, në një tubim në Lug të Drinit foli për rëndësinë e zhvillimit ekonomik dhe anëtarësimit të Kosovës në NATO si pjesë e planit të tij për fuqizimin e shtetit dhe sigurinë e ardhshme të vendit.
Kreu i Aleancës për Ardhmërinë e Kosovës (AAK), Ramush Haradinaj, tha se fryma e Aleancës Fituese po mbizotëron edhe atje, ku historia dhe trimëria janë gdhendur thellë në çdo familje.
“Sot morëm mbështetje të fuqishme për vizionin e Kosovës Fituese. Në Lug të Drinit, ku historia dhe trimëria janë gdhendur thellë në çdo familje, qytetarët e këtij rajoni janë të angazhuar për një të ardhme më të mirë për vendin,” u shpreh Haradinaj tubimit lektoral në Lug të Drinit.
Ai theksoi se një nga prioritetet kryesore të Aleancës është zhvillimi ekonomik dhe fuqizimi i shtetit përmes anëtarësimit të Kosovës në NATO.
“Do ta bëjmë realitet planin tonë për zhvillim ekonomik, për fuqizim të shtetit përmes anëtarësimit direkt në NATO. Kjo është e domosdoshme për të siguruar një të ardhme të sigurt për të gjithë qytetarët tanë,” shtoi ai.
Haradinaj gjithashtu u shpreh se fitorja e listës 137 është një fitore e çdo qytetari që beson në një Kosovë më të mirë.
“Fitorja e listës 137 do të jetë fitore e çdo qytetari që beson në një Kosovë më të mirë. Me 9 shkurt – të gjithë për Kosovën Fituese 137,” tha ai, duke ftuar qytetarët të japin mbështetje për të realizuar këtë vizion.
