Mbi gjysmë milioni shqiptarë të Kosovës jetojnë në diasporë. Ata sot shfrytëzuan të drejtën e tyre për votë në zgjedhjet e 9 shkurtit. Nga mbi 104 mijë votues, rreth 84 mijë prej tyre kanë votuar me postë. I gjithë ky proces është vëzhguar nga zyrtarët e Komisionit Qendror të Zgjedhjeve.
Mërgimtarët kosovarë kanë pasur mundësi të votojnë fizikisht sot në përfaqësi diplomatike dhe konsullore në vendet ku jetojnë.
Vendvotimet në përfaqësi diplomatike dhe konsullore janë hapur prej orës 07:00 deri në orën 19:00, sipas kohës lokale në vendet përkatëse.
Të drejtë vote kanë pasur të gjithë ata që kanë poseduar dokumentet identifikues të lëshuara nga Kosova, si letërnjoftim, pasaportë ose lejen e vozitjes dhe që është regjistruar paraprakisht për votim.
Prej 104,924 të regjistruar, 84.525 prej tyre kanë përzgjedhur mënyrën e votimit përmes postës.
Tërheqja e zarfeve si dhe transporti i tyre me vetura zyrtare të Ministrisë së Punëve të Jashtme për në zyrën e Komisionit Qendror te Zgjedhjeve në Prishtinë, vëzhgohet nga zyrtarë të autorizuar të KQZ-së.
Procesi i tërheqjes së zarfeve vëzhgohet nga vëzhguesit e akredituar të subjekteve politike të certifikuara: Lëvizja VETËVENDOSJE, Partia Demokratike e Kosovës dhe Aleanca Për Ardhmërinë e Kosovës.
Sipas regjistrimit të popullsisë, në diasporë jetojnë rreth 550 mijë kosovarë.
