Kryetari i Partisë Demokratike të Kosovës (PDK), Memli Krasniqi, ka shprehur mirënjohje për të gjithë qytetarët, anëtarët dhe aktivistët që kontribuuan në fushatën zgjedhore dhe mbështetën vizionin e partisë për një Kosovë më të mirë.
Në një mesazh publik, Krasniqi falënderoi secilin votues dhe veçanërisht aktivistët dhe strukturat e PDK-së për angazhimin e tyre të palodhshëm. Ai theksoi se mbi 200 mijë vota për PDK-në nuk janë thjesht një rezultat zgjedhor, por një zotim për të ardhmen e vendit.
“Ky rrugëtim ishte më shumë se një garë politike; ishte një përpjekje e përbashkët për një Kosovë më të mirë. Jam krenar për kulturën demokratike që kemi treguar dhe për mbështetjen e madhe që kemi marrë,” tha Krasniqi.
Ai shprehu një falënderim të veçantë për kandidatin e PDK-së për kryeministër, Bedri Hamza, duke vlerësuar fushatën e tij unifikuese dhe profesionale. “Vlerat dhe përkushtimi i tij do të jenë udhërrëfyesi ynë në rrugëtimin politik përpara,” theksoi ai.
Në fund, Krasniqi siguroi mbështetësit se PDK-ja do të vazhdojë përpjekjet e saj për një Kosovë më të zhvilluar, duke e konsideruar këtë si fillimin e një kapitulli të ri për vendin.
“Rrugëtimi ynë për #MaMirë vazhdon. Për Kosovën. Për të ardhmen. Për qytetarët,” përfundoi ai. /Kosovatimes/
