Eksperti i zgjedhjeve nga Demokracia në Veprim (DnV), Eugen Cakolli, ka analizuar ndarjen e mandateve në Kuvendin e Kosovës bazuar në rezultatet preliminare të votave të rregullta.
Sipas tij, për partitë shqiptare, ndarja aktuale e mandateve është si vijon: LVV – 47 deputetë, PDK – 25 deputetë, LDK – 20 deputetë dhe AAK – 8 deputetë.
Megjithëse mbeten për t’u numëruar rreth 100-120 mijë vota të tjera, përfshirë ato nga diaspora dhe votat me kusht, Cakolli vlerëson se ndikimi i tyre në rezultatin përfundimtar do të jetë margjinal.
Ai thekson se LVV zakonisht performon më mirë në votat jashtë vendit dhe, në varësi të përqindjes që arrin, mund të fitojë deri në katër mandate shtesë. Në skenarin më të mirë, ku LVV merr mbi 75% të votave jashtë Kosovës, ajo mund të arrijë deri në 51 deputetë. Në skenarin më pesimist, mund të bjerë në 46 mandate.
Ndërkohë, Cakolli sqaroi se votat e partive që nuk e kalojnë pragun nuk i shpërndahen asnjë subjekti tjetër, por thjesht nuk përfshihen në ndarjen e mandateve.
Rezultatet përfundimtare pritet të konfirmohen pas përpunimit të të gjitha votave nga Komisioni Qendror i Zgjedhjeve. /Kosovatimes/
