Skender Merturi, bibliotekist në Bibliotekën “Kongresi i Manastirit” në Klinë, gjatë një lidhjeje të drejtpërdrejtë në RTK ka ndarë informacione interesante rreth funksionimit të bibliotekës.
Ai ka shpjeguar se biblioteka ka ekzistuar edhe para luftës, megjithatë, ka pasur më pak ekzemplarë. Pas luftës, kjo bibliotekë është furnizuar me shumë më tepër libra dhe është bërë shumë më e pasur.
Ai ka theksuar se çdo vit biblioteka furnizohet me tituj të rinj dhe ka një bashkëpunim të mirë me autorët nga Klina, të cilët i sjellin titujt e rinj, si dhe me autorë nga vende të tjera që i dhurojnë librat e tyre.
“Një ndër librat më të vjetër që e ka kjo bibliotekë dhe lexuesit mund ta gjejnë është libri ‘Meshari’ i Gjon Buzukut, i cili nuk lejohet të dalë nga biblioteka. Vetëm aty mund të shfletohet, të hulumtohet dhe të trajtohet me shumë kujdes, pasi që është shumë i vjetër,” ka thënë Merturi.
Për momentin, ai ka deklaruar se biblioteka ka rreth 33 mijë ekzemplarë libra, me tituj të ndryshëm. Po ashtu, ai ka përmendur se ka libra të gjuhëve të huaja si: anglisht, serbisht, turqisht, gjermanisht etj.
