Është joreale të besohet se është e mundur të ktheheni në kufijtë e Ukrainës nga viti 2014, thotë sekretari amerikan i Mbrojtjes, Pete Hegseth, në një takim të NATO-s, në Bruksel. Ai theksoi se as anëtarësimi i Ukrainës në NATO nuk është realist.
Fjalët e Hegseth-it vijnë në fillim të takimit të së mërkurës të të ashtuquajturit ‘Grupi Ramstein’, që përfaqëson rreth 50 vendet që mbështesin ushtarakisht Ukrainën.
Sekretari i ri i Mbrojtjes i SHBA-së jep një pamje të zymtë të situatës, raportojnë mediet e huaja.
“Jemi në një situatë kritike. Mesazhi ynë është i qartë: gjakderdhja duhet të marrë fund. Lufta duhet të përfundojë”, thotë Hegseth, duke shpjeguar se presidenti Donald Trump dëshiron t’i japë fund luftës përmes diplomacisë dhe se Rusia dhe Ukraina duhet të ulen në tryezën e bisedimeve.
Më pas vjen ajo që shumëkush prisnin, por pak guxuan të flisnin hapur: që Ukraina nuk mund të llogarisë në kthimin e zonave që Rusia ka pushtuar në faza që nga viti 2014, kryesisht Gadishullin e Krimesë dhe shumicën e rajoneve Donetsk dhe Luhansk.
Jo Krime, jo NATO
“Është joreale të besohet se është e mundur të ktheheni në kufijtë e Ukrainës që nga viti 2014”, tha Hegseth, duke shtuar se anëtarësimi në NATO është një rezultat joreal.
Sekretari i Mbrojtjes përsërit gjithashtu dëshirën e presidentit Trump që vendet e NATO-s të rrisin objektivin e tyre se sa shpenzojnë për mbrojtjen e tyre në ekuivalentin e pesë për qind të buxhetit.
Por ai gjithashtu premton se Shtetet e Bashkuara nuk kanë ndërmend të braktisin NATO-n.
“Shtetet e Bashkuara ruajnë angazhimin e tyre ndaj të gjitha vendeve të NATO-s dhe bashkëpunimit të mbrojtjes me Evropën”, tha Hegseth në Bruksel.
