Ende nuk dihet se sa kohë do të marrë numërimi i votave për kandidatët për deputetë, të cilët në zgjedhjet e 9 shkurtit garuan për të zënë ulëse në Kuvendin e Republikës.
Zëdhënësi i KQZ-së, Valmir Elezi, tha se është vështirë të përcaktohen një afat kohor.
“Në rrethana të tilla një grup numërimi, një tavolinë numërimi mund të bëjë numërim deri në dy kuti votimi brenda ditës, nëse kemi pjesëmarrje relativisht mesatare në zgjedhje”, tha ai.
Sipas tij, për KQZ-në nuk është me rëndësi shpejtësia për të dalë me rezultate, por saktësia.
“Çdo votë të evidentohet me saktësi dhe që vullneti i qytetarëve, i votuesve të evidentohet, të regjistrohet e pastaj rezultati të bëhet publik”, tha ai.
Tutje, Elezi ka treguar se përpos qendrave që numërimin e nisën të martën, në të tjera komuna pritet që të fillojë procesi i numërimit të votave të kandidatëve.
Ai tregoi se ky proces në Qendrat Komunale të Numërimit do të fillojë në Deçan, Gjakovë, Drenas, Gjilan, Fushë Kosovë, Kamenicë, Mitrovicë e Jugut, Skenderaj, Shtërpce, Viti, Ranillkug, Kllokot dhe Mitrovicë e Veriut.
Ndërkohë, Elezi ka thënë se në bazë të konfirmimeve nga terreni janë edhe 14 Qendra Komunale në 14 komuna të ndryshme, të cilat janë të gatshme për të filluar këtë proces, e të tjera ende po i bëjnë përgatitjet e nevojshme që të fillojnë numërimin.
Ka njoftuar se pas menjëherë pasi të përfundojë numërimi i votave të kandidatëve, është procesi i numërimit të votave me kusht, të personave me nevoja të veçanta e atyre nga diaspora.
