Kryesia e OVL të UÇK-së, në takimin e mbajtur sot, ka vendosur se nuk do të ketë asnjë lloj bashkëpunimi me institucionet në detyrë të Qeverisë së Kosovës, lidhur me festimin e 17-vjetorit të shpalljes së Pavarësisë së Kosovës dhe manifestimin e 27-vjetorit të Epopesë së UÇK-së të Familjes Jashari të datës 5,6 dhe 7 mars.
Në arsyetimin e kësaj organizate thuhet se Qeveria aktuale e Kosovës nuk ka treguar asnjëherë gatishmërinë e saj që të bashkëpunojë me OVL UÇK-në, duke i përjashtuar nga çdo formë e financimit dhe mbështetjes ligjore dhe institucionale, por vetëm duke i linçuar ofenduar, përjashtuar dhe persekutuar nga çdo e drejtë ligjore.
“Duke parë të arsyeshme se kjo Qeveri ka qenë një nga Qeveritë që ka shkelur çdo të drejtë tonën, ne si OVL e UÇK-së do të organizohemi me degët tona në çdo komunë të Kosovës që heronjtë, dëshmorët dhe sakrificën sublime të UÇK-së në këto dy data historike në mënyrë të organizuar nga Kryesia e OVL UÇK-së dhe degët tona t’i festojmë dhe nderojmë në mënyrën më fisnike që na përket neve si luftëtarë të UÇK-së”, thuhet në njoftim.
Për këtë vendim që ka marrë OVL e UÇK-së, RTKlive e ka pyetur Qeverinë në detyrë, por deri në momentin e publikimit të këtij lajmi ende nuk ka marrë përgjigje.
