Trajneri i Real Madridit, Carlo Ancelotti, ka shprehur pakënaqësinë e tij për pyetjet e vazhdueshme lidhur me një transferim të mundshëm të Vinicius Junior në Arabinë Saudite.
Gjatë konferencës për shtyp të premten, para ndeshjes së La Liga ndaj Osasuna, trajneri italian është përpjekur që ta zhvendosë fokusin te forma e brazilianit.
“Ka shumë pyetje. A jam lodhur nga kjo temë? Po. A jam i shqetësuar? Jo. A e shoh atë të lumtur? Po”, ka thënë trajneri madrilen, duke nënvizuar se nuk ka asgjë të re për të shtuar.
“Ne jemi të lumtur me të, nuk kam çfarë të shtoj më shumë nga sa kam thënë një ose dy javë më parë. Ai është i njëjti Vinicius, me shumë dëshirë për të bërë mirë. Këtë e tregoi edhe në ndeshjen e fundit”, ka thënë Ancelotti.
Sulmuesi brazilian ka qenë protagonist në fitoren 3-2 të Real ndaj Manchester City të martën, në ndeshjen e parë të fazës së eliminimit direkt në Champions League, ku është shpallur edhe lojtari më i mirë i ndeshjes.
