Kryetari i Prishtinës, Përparim Rama, ka uruar Universitetin e Prishtinës me rastin e 55-vjetorit të themelimit të tij duke e cilësuar këtë institucion si një shtyllë të dijes dhe identitetit kombëtar.
Në një postim, Rama ka vlerësuar rolin jetik të Universitetit të Prishtinës në periudha të vështira për Kosovën duke e cilësuar atë si një faktor kyç në ruajtjen e gjuhës shqipe dhe në mbështetjen e sistemit paralel të arsimit gjatë kohës së okupimit.
“Ky universitet ka qenë një dimension i rëndësishëm i qëndresës dhe mbijetesës sonë gjatë kohës së okupimit, duke krijuar kuadro që e kanë mbajtur gjallë sistemin paralel të arsimit para luftës dhe ka vazhduar të luajë rol jetik edhe pas krijimit të shtetësisë sonë,” ka shkruar Rama.
Ai ka nënvizuar se ky përvjetor është një moment për të nderuar të gjithë ata që kanë kontribuar në avancimin e arsimit dhe për të vlerësuar suksesin e vazhdueshëm të Universitetit të Prishtinës në edukimin e brezave të rinj.
“Urime 55-vjetorin dhe suksese të mëtejshme për këtë institucion, që ka qenë një shenjë e shpresës, identitetit dhe qëndrueshmërisë për të gjithë ne!” përfundon urimi i kryetarit të Prishtinës. /Kosovatimes/
