Kryeministri i Maqedonisë së Veriut Hristijan Mickoski paralajmëroi hapjen e çështjes së ndryshimit të stemës së shtetit. Ai tha se, Maqedonia e Veriut është një nga dy vendet postsocialiste që ende e ka stemën e vjetër shtetërore.
Njëri prej udhëheqësve të koalicionit VLEN, Arben Taravari, u shpreh i gatshëm të diskutoj për të gjitha çështjet që kanë mbetur të pazgjidhura nga e kaluara, siç janë: himni, stema dhe 20% -shi në Kushtetutë.
“Unë mendoj se është momenti tani ,t’i hapim disa çështje dhe t’i zgjidhim njëherë e për çdoherë. Unë mendoj se janë më shumë tema. Është fakt se stema dhe himni. Në shtetet pos komuniste ndër të rrallat është Maqedonia që nuk ka ndryshuar as himnin as stemën. Kështu që ne si koalicion VLEN jemi të gatshëm ti hapim këto biseda, por ti zgjidhim në paketë disa çështje që nuk janë zgjidhur vite me radhë”, tha Taravari, kryetar i ASH-së
Nga LSDM-ja opozitare u shprehën kundër idesë së ndryshimit të stemës.
“Kjo deklaratë e ministrit Taravari është shokuese. Në vend të zgjidhjeve për problemet reale, Qeveria merret me tema nga e kaluara për ta tërhequr vëmendjen nga e tashmja e dhimbshme”, tha Metodija Ilievski, nënkryetar i LSDM-së.
Për ndryshimin e stemës apo himnit të shtetit, nevojiten votat e shumicës absolute në Kuvend.
