Presidenti Francez Emmanuel Macron thirri sot një takim urgjent të liderëve evropianë në Paris për të koordinuar qëndrimin e tyre mbi bisedimet e paqes për Ukrainën. Në takim marrin pjesë liderët e Gjermanisë, Italisë, Polonisë, Spanjës, Holandës, Danimarkës dhe Britanisë, si dhe presidentja e Komisionit Evropian Ursula von der Leyen dhe Sekretari i Përgjithshëm i NATO-s Mark Rutte. Kjo nismë vjen pas negociatave SHBA-Rusi, të cilat përjashtuan partnerët evropianë dhe Ukrainën nga procesi.
Në të njëjtën kohë, zyrtarët amerikanë dhe rusë po fillojnë bisedimet e paqes në Arabinë Saudite pa pjesëmarrjen e Ukrainës dhe vendeve evropiane. Ky zhvillim ka ngritur shqetësimin e liderëve evropianë për margjinalizimin e mundshëm të Evropës në zgjidhjen e konfliktit në Ukrainë. Presidenti ukrainas Volodymyr Zelensky ka shprehur mosbesim ndaj synimeve të Rusisë dhe ka paralajmëruar për shanset e ulëta për mbijetesën e Ukrainës pa mbështetjen e vazhdueshme ushtarake të SHBA.
Kancelari gjerman Olaf Scholz tha sot se tani nuk është koha e duhur për të diskutuar dërgimin e paqeruajtësve në Ukrainë, duke theksuar se bisedimet nuk duhet të vazhdojnë pa pjesëmarrjen e Kievit, transmeton Anadolu.
Një delegacion rus i kryesuar nga ministri i Jashtëm Sergei Lavrov ka mbërritur në Riad përpara bisedimeve dypalëshe me SHBA-në nesër.
Të dy palët pritet të shkëmbejnë informacion mbi një marrëveshje të mundshme paqeje mbi Ukrainën.
Kryeministri holandez Dick Schoof pranoi për mediat se Evropa e ka marrë për zemër mesazhin e SHBA se duhet të investojë më shumë në aftësitë e saj të mbrojtjes.
Por ai theksoi gjithashtu se liderët evropianë janë të vendosur të punojnë ngushtë me SHBA-në për të siguruar që çdo zgjidhje të jetë e qëndrueshme.
