Eliminimi nga Real Madridi ka bërë që Pep Guardiola të reflektojë mbi situatën e vështirë që po kalon Manchester City.
Pas eliminimit në Ligën e Kampionëve, trajneri spanjoll për herë të parë ka folur hapur për mundësinë e mbylljes së një cikli të suksesshëm në klub.
“Nuk ndihem i pafuqishëm. Vitet e kaluara kemi qenë një ekip i madh, por këtë sezon jo. Arsyet janë të shumta. Me City-n kemi arritur diçka të jashtëzakonshme në Premier League, duke fituar katër tituj në pesë vite. Tani, duhet të luftojmë për një nga katër ose pesë vendet e para për të siguruar pjesëmarrjen në Champions sezonin e ardhshëm. A mund të flasim për fundin e një cikli? Mbase po. Asgjë nuk zgjat përgjithmonë”, deklaroi Guardiola.
Megjithatë, trajneri spanjoll siguroi se është i gatshëm të vazhdojë të udhëheqë skuadrën drejt sfidave të ardhshme. “Po, po, patjetër! Dua të vazhdoj”, theksoi ai.
Manchester City ndodhet përballë një momenti delikat, ku do të kërkojë të rikthehet më i fortë për të konkurruar sërish në nivelet më të larta.
