Nënkryetari i LDK-së dhe kryetari i degës për Gjilan, Lutfi Haziri ka deklaruar se Lidhja Demokratike e Kosovës (LDK) ka dëshmuar vazhdimisht konstruktivitetin për të mirën e përgjithshme në Gjilan duke vënë interesin e qytetarëve mbi atë partiak.
Ai ka falënderuar kryesuesin e Kuvendit Komunal, Kushtrim Kadriu, për përpjekjet e tij në adresimin e dallimeve sa i përket buxhetit të komunës. Sipas Hazirit, ekzekutivi komunal ka vepruar në mënyrë të njëanshme dhe pa koordinim me Kuvendin.
“LDK, si partia më e madhe në Kuvend, ka treguar përgjegjësi dhe bashkëpunim për të mirën e Gjilanit. Ne e duam këtë qytet më shumë se partinë dhe këtë e kemi dëshmuar me vendime që sigurojnë zbatimin e ligjit,” tha ai.
Haziri theksoi se buxheti komunal duhet të përgatitet dhe miratohet në përputhje me udhëzimet e Ministrisë së Administrimit të Pushtetit Lokal (MAPL), duke përfshirë konsultimet me palët e interesuara dhe dëgjimet publike.
“Ne kemi garantuar që 4.2 milionë euro nga grantet qeveritare të shkojnë për qytetarët, për punëtorët shëndetësorë dhe arsimtarët. Përkushtimi ynë për Gjilanin do të vazhdojë me përgjegjësi dhe angazhim,” përfundoi Haziri. /Kosovatimes/
