Nga 10 dhjetori i vitit të kaluar në Kosovë është lansuar mekanizimi i mbikëqyrjes elektronike të personave të dyshuar për vepra penale. E Policia e Kosovës ka treguar se ky sistem tashmë është funksional në të gjitha drejtoritë rajonale të Policisë.
Që nga dhjetë dhjetori i 2024-s Policia e Kosovës ishte pajisur me hallkat elektronike të cilat përdorën për mbikëqyrje të të dënuarve për dhunë në familje në mënyrë që të pandehurit të qëndrojnë larg viktimës.
Ndonëse nuk kanë treguar sesa persona përcillen me hallka elektronike, Policia e Kosovës i ka treguar Dukagjinit se tashmë ato janë funksionale në të gjitha drejtoritë rajonale.
“Rreth projektit për Monitorimin Elektronik të Urdhrave Mbrojtës u njoftojmë se Policia e Kosovës ka kryer të gjitha veprimet e nevojshme për implementimin e këtij projekti duke përfshirë trajnimin e personelit të nevojshëm si dhe ka vendosur dhe funksionalizuar sistemin në të gjitha drejtoritë rajonale”-Policia e Kosovës.
Ndërkohë, ish koloneli i Policisë së Kosovës, Refki Morina po thotë se kjo do ta lehtësoj punën e PK-së dhe do të ulë rastet e dhunës në familje.
“Vendimin për vendosjen e këtyre hallkave tek kryesit e veprave penale të dhunës në familje e merr Gjykata në mënyrë që të ruhen këta kryes të veprave penale që mos ta përsërisin. Në momentin që ata afrohen te viktima menjëherë alarmohet policia”, ka thënë Refki Morina – Ish-kolonel i Policisë.
Kjo mund të ndikoj në uljen e rasteve por sipas avokatit, Ardian Bajraktari ky proces është vonuar shumë sepse ligji ekziston qysh prej vitit 2015.
“Aplikimi i këtij ligji në masë të konsiderueshme do të nënkuptonte parandalim të dhunës në familje ose riviktimizim të kësaj kategorie por vlerësoj që do të ketë impakt edhe për sa i përket masës së shqiptimit të masave të tjera alternative për sigurimin e të pandehuri në procedurë përveç paraburgimit”, ka thënë Ardian Bajraktari – Avokat.
Shkelja e urdhrit mbrojtës nga të dyshuar për dhunë në familje, u ka kushtuar me jetë disa grave viteve të fundit./.Dugagjini
