Është miratuar Projektligji për Zyrtarët Publikë në lexim të dytë në Kuvendin e Kosovës.
Pro miratimit të këtij projektligji, kanë votuar për 58 deputetë, ndonëse miratimi i këtij projektligji është bërë pas kritikave të shumta dhe vërejtjeve nga opozita në Kuvend.
Driton Selmanaj nga Lidhja Demokratike e Kosovës tha se Qeveria Kurti po tenton ta shkatërrojë administratën e shtetit, sepse në Kosovë nuk ka qenë sistemi i keq, porse njerëzit e kanë prishur atë sistem.
Selmanaj ka akuzuar Lëvizjen Vetëvendosje për politizimin e administratës shtetërore.
“Kjo parti nuk ka reflektuar as pas shqetësimit të Zyrës së BE-së për këto projektligje. Ne po e shfrytëzojmë rastin si LDK të shprehim më tepër se shqetësimin tonë për qasjen Qeverisë në raport me 80 mijë njerëz që punojnë në administratë. Ky është shembull se si po tenton një qeveri ta shkatërrojë këtë sistem. Në Kosova s’ka qenë sistemi i keq, njerëzit e kanë prishur atë sistem”, tha Selmanaj, duke shtuar se me këtë qasje shkatërrohet administrata e shtetit të Kosovë.
Po ashtu sipas tij, me këtë ligj, bëhet diferencimi i administratës publike dhe se afati 4-vjeçar i secilës pozitë i nivelit të mesëm e të lartë, është mundësi për korrupsion e nepotizëm.
“Askush në Kosovë nuk është i sigurt se do të jetë pjesë e Administratës pas 4 viteve. Ku është interesi që njerëzit të bëhen pjesë e administratës”, ka pyetur Selmanaj.
Tahiri: Projektligj për Zyrtarët Publikë, cenon në thelb punën e administratës
Shefi i grupit parlamentar të Partisë Demokratike të Kosovës, Abelard Tahiri ka thënë se me këtë projektligj për zyrtarët publikë, i cili po shqyrtohet sot në Kuvend, do të cenohet pavarësia dhe kualiteti i administratës.
Tahiri tha se shprehi shqetësimin që në lexim të parë, se ky projektligj që do t votohet nga mazhoranca cenon shumë administratën dhe shërbimin civil.
“Ky ligj që sot do të votohet do ta devijojë punën e shërbimit civil… Tani po rrezikoni të dëmtoni cilësinë në administratën civile, kjo administratë implementon politikën e juaj qeveritare dhe tani dëmtimi e politizimi i saj është i dëmshme, më parë nuk e kemi bërë dhe ju tani po e bëni”, tha Tahiri.
Tahiri i bëri ftesë Qeverisë që ta tërheqë këtë, sepse kështu e politizon tej mase administratën publike. “Ka vend për përmirësime, por jo kështu pasivisht të bëhet ndryshime që dëmtojnë punën e administratës publike, ndryshe PDK nuk merr pjesë në votim”, tha Tahiri.
