Këshilli për Mbrojtjen e të Drejtave dhe Lirive të Njeriut përmes një komunikate për media ka kundërshtuar rritjen e mundshme të tarifave të energjisë elektrike.
Tre operatorët e energjisë elektrike, KOSTT, KEDS dhe KESCO i janë drejtuar me një kërkesë ZRRE me të cilën kërkojnë rritjen e çmimit të energjisë elektrike nga data 1 prill 2025 për 35 përqind. Nga ZRRE kanë pranuar një kërkesë të tillë të operatorëve, por kanë thënë se vendimi do të merret pas një debati me qytetarë. Megjithatë, KMDLNj këtë e vlerëson si mashtrim dhe përpjekje për të zhvendosur vëmendjen.
“Para zgjedhjeve të 9 shkurtit 2025 ZRRE ka pohuar se nuk do të ketë rritje të çmimit të energjisë elektrike. Ende pa u bërë publike rezultatet e këtyre zgjedhjeve , operatorët e energjisë elektrike po kërkojnë një rritje marramendëse dhe jonormale të çmimit të energjisë elektrike në ndërkohë që pjesa dërrmuese e qytetarëve të Kosovës po përpiqet të mbijetojë kurse shumë biznese, ose kanë falimentuar ose janë duke falimentuar”, thuhet në reagimin e KMDLNj-së.
Sipas këtij këshilli rritja e çmimit të energjisë elektrike do të prodhonte efekte zinxhirore, duke rritur çmimet e artikujve te domosdoshëm si dhe të gjitha shërbimeve.
“Qytetarët duhet të kundërshtojnë me të gjitha mjetet e lejuara shtrenjtimin kriminal të energjisë elektrike, prej protestave të vazhdueshme e deri te refuzimi i pagesës së faturave me shtrenjtimet e paralajmëruara. Nga të ardhurat e përgjithshme pjesa dërrmuese e familjeve detyrohen të ndajnë prej 13 deri në 16 përqind të ardhurave për shlyerjen e faturave për rrymën. Ndërkohë, në vendet e zhvilluara kjo përqindje nuk e kalon 3 deri 6 përqind. Refuzimi i qytetarëve nuk duhet të përdoret për qëllime politike nga askush siç ka ndodhur më parë duke i dhënë krejt tjetër karakter. Refuzoni politikanët , mbroni të drejtat ekonomike dhe sociale. Kundërshtoni artogancën dhe mashtrimin e ZRRE së kriminalizuar dhe mos bëni kompromis me asnjë qeveri , pavarësisht nga kush udhëheqet në dëmin tuaj”, thuhet tutje në komunikatën e KMDLNj-së.
Tutje KMDLNj thekson se kushdo që udhëheq me qeverinë duhet të detyrohet ta bëjë indeksimin e çmimeve, teksa ka ftuar qytetarët të mobilizohen kundër rritjes së paralajmëruar të çmimit të energjisë elektrike sikur që e bëjnë në të gjitha vendet.
