“Mbretëria e Bashkuar përshëndeti deklaratën e Kryesuesit të Bordit Drejtues të Këshillit për Zbatimin e Paqes më 25 shkurt. Ne besojmë se është thelbësore që të gjithë në BiH të përmbahen nga ndërhyrjet dhe të respektojnë pavarësinë e gjyqësorit. Ne jemi të qartë se të gjithë aktorët politikë duhet të respektojnë vendimet e institucioneve gjyqësore të BiH integriteti dhe sovraniteti i Bosnjë-Hercegovinës”, tha Ambasada e Mbretërisë së Bashkuar në Bosnje dhe Hercegovinë.
Ky reagim vjen pasi presidenti i Republika Srpska Milorad Dodik u dënua me gjashtë vjet ndalim të veprimtarisë politike dhe një vit burg për mosbindje ndaj vendimeve të Gjykatës Kushtetuese të BiH dhe përfaqësuesit të lartë ndërkombëtar. Dodik njoftoi një bllokadë të institucioneve shtetërore në territorin e Republikës Srpska, e cila mund të destabilizojë më tej situatën politike në vend. Parlamenti i Republikës Srpska planifikon t’i shqyrtojë këto masa në një seancë të caktuar për sot.
Kremlini e dënoi vendimin, duke pretenduar se ai ishte “i motivuar politikisht dhe kërcënon të destabilizojë Ballkanin”. Nga ana tjetër, Shtetet e Bashkuara dhe Bashkimi Evropian kanë shprehur kundërshtim të fortë ndaj çdo lëvizjeje që do të cenonte sovranitetin dhe integritetin territorial të Bosnjë-Hercegovinës.
Ambasada e Mbretërisë së Bashkuar në BiH theksoi më parë se Republika Srpska është një pjesë legjitime dhe integrale e Bosnje-Hercegovinës dhe se kërcënimet e “ndarjes paqësore” nuk janë vetëm të rrezikshme, por edhe të bazuara në supozime të pasakta. Ata theksuan se Republika Srpska nuk mund të ekzistojë jashtë Bosnje dhe Hercegovinës dhe se ekzistenca e saj buron nga Marrëveshja e Paqes e Dejtonit.
