Ministrja e Drejtësisë, Albulena Haxhiu ka reaguar pas komunikatës së përbashkët të Këshillit Prokurorial të Kosovës dhe Zyrës së Kryeprokurorit të Shtetit.
Këto dy institucione akuzuan kryeministrin Albin Kurti për përpjekje të degradimit të organeve kushtetuese, teksa i dhanë mbështetje të fuqishme Prokurorisë Speciale për realizimin e detyrave dhe përgjegjësive ligjore të saj.
“Le t’i tregojë dikush KPK-së dhe ZKPSH-së, që Kryeministri, Albin Kurti nuk është kryeministër në detyrë dhe se sot është data 4 mars dhe jo 4 shkurt. Fakti që i referohen si kryeministër në detyrë flet shumë”, ka shkruar Haxhiu në Facebook.
Kryeministri Kurti sot nuk u paraqit për të dëshmuar në Prokurorinë Speciale lidhur me rastin e rezervave shtetërore. Ai ka thënë se asnjëherë nuk ka refuzuar të japë dëshmi, porse këtë tha se do ta bëjë në Zyrën e Kryeministrit, teksa akuzoi Prokurorinë për luftë ndaj Qeverisë.
