Administrata e Donald Trump ka hedhur poshtë një plan të shumëpritur për rindërtimin e Gazës që është mbështetur nga liderët arabë, duke thënë se presidenti qëndron në vizionin e tij, i cili përfshin dëbimin e popullsisë palestineze nga zona dhe kthimin e saj në një “rivierë” në pronësi të Shteteve të Bashkuara.
“Propozimi aktual nuk adreson realitetin se Gaza është aktualisht e pabanueshme dhe se banorët nuk mund të jetojnë njerëzisht në një territor të mbuluar me mbeturina dhe municione të pashpërthyera. Presidenti Trump qëndron në vizionin e tij për rindërtimin e një Gaze të lirë nga Hamasi. Ne mezi presim diskutime të mëtejshme për të sjellë paqe dhe prosperitet në rajon”, tha zëdhënësi i Këshillit të Sigurisë Kombëtare në një deklaratë të martën.
Plani i pasluftës për Rripin e Gazës, i propozuar nga Egjipti dhe që i bën thirrje Hamasit t’ia dorëzojë pushtetin një administrate të përkohshme derisa Autoriteti Palestinez i reformuar të marrë kontrollin, do të lejonte rreth dy milionë palestinezë të mbeten, ndryshe nga propozimi i Trump.
Izraeli ka refuzuar çdo rol të Autoritetit Palestinez në Gaza.
Një propozim prej 53 miliardë dollarësh nga vendet arabe kërkon rindërtimin e Gazës deri në vitin 2030. Faza e parë kërkon fillimin e heqjes së municioneve të pashpërthyera dhe pastrimin e më shumë se 50 milionë tonëve rrënoja të mbetura nga bombardimet dhe ofensivat ushtarake izraelite.
Armëpushimi aktual në Gaza, në fuqi që nga janari, mbetet në pikëpyetje pasi faza e parë e tij skadoi të shtunën. Izraeli ka pranuar, thotë ai, një propozim alternativ të SHBA-së për të zgjatur ndërprerjen e armiqësive dhe lirimin e të bugosurve të marrë në sulmin e Hamasit në Izraelin jugor më 7 tetor 2023, i cili shkaktoi luftën.
Izraeli ka bllokuar hyrjen e ushqimit, karburantit, ilaçeve dhe furnizimeve të tjera në Gaza dhe ka paralajmëruar për pasoja të mëtejshme, duke rritur frikën për një rikthim në luftime.
Pezullimi i ndihmës ka tërhequr kritika të gjera, me grupet e të drejtave të njeriut që thonë se ajo ka shkelur detyrimet e Izraelit si një fuqi pushtuese sipas ligjit ndërkombëtar.
Duke folur në samit, duke shpallur një plan për të ardhmen e Gazës, presidenti egjiptian Abdel Fattah el-Sissi tha se nuk do të kishte “paqe të vërtetë” pa krijimin e një shteti palestinez.
Izraeli është zotuar të mbajë kontroll të pakufizuar të sigurisë mbi Gazën dhe Bregun Perëndimor, të cilin e pushtoi në Luftën e Lindjes së Mesme të vitit 1967 dhe që palestinezët e duan për shtetin e tyre të ardhshëm.
Qeveria izraelite dhe pjesa më e madhe e klasës së saj politike kundërshtojnë shtetësinë palestineze.
