RRETH 20 SHTETE, kryesisht nga Evropa dhe Komonuelthi, kanë shfaqur interes për t’iu bashkuar të ashtuquajturave koalicioni i të vullnetit, i cili do t’i ofronte ndihmë Ukrainës, raportojnë mediat britanike.
Zyrtarët britanikë konfirmuan se një takim u mbajt dje për të diskutuar garancitë e mundshme të sigurisë për Ukrainën pas një marrëveshjeje të mundshme paqeje.
Nuk është e nevojshme që të gjitha vendet pjesëmarrëse në bisedimet në kuadër të kësaj iniciative të jenë të gatshme të dërgojnë ushtarët e tyre në Ukrainë, disa mund të ofrojnë lloje të tjera mbështetjeje.
Zyrtarët theksojnë se kjo është një fazë e hershme e negociatave, por ata e konsiderojnë këtë hap “jashtëzakonisht pozitiv”.
Zëvendës zëdhënësi zyrtar i kryeministrit britanik tha se qeveria “e ka bërë të qartë se është koha që Evropa dhe Mbretëria e Bashkuar të marrin përgjegjësi më të mëdha dhe mendoj se ne po e shohim këtë ditë pas dite”.
Nisma për të formuar një “koalicion të vullnetarëve” vjen nga Mbretëria e Bashkuar, përkatësisht nga zyra e kryeministrit britanik Keir Starmer.
“Koalicioni i Vullnetit” është emri për një grup joformal shtetesh që janë të gatshëm që në mënyrë të pavarur, jashtë kornizave ekzistuese ndërkombëtare si NATO ose BE, të ofrojnë forma të ndryshme mbështetjeje për Ukrainën, duke përfshirë garancitë e sigurisë, ndihmën ushtarake ose mbështetjen financiare, veçanërisht në kontekstin e një marrëveshjeje të mundshme paqeje. Këto janë vende që duan të marrin pjesë aktive në mbrojtjen afatgjatë të sigurisë së Ukrainës, pavarësisht nga konsensusi më i gjerë ndërkombëtar.
