Një gjykatë gjermane ka dënuar me burg pesë anëtarë të një grupi ekstremist të lidhur me lëvizjen Reichsbürger për planifikimin e një grushti shteti dhe rrëmbimin e ministrit të shëndetësisë.
Katër meshkuj të moshës 46 deri në 58 vjeç dhe një grua 77-vjeçare u dënuan me burgime të ndryshme, më e shkurtra prej të cilave ishte pesë vjet e nëntë muaj burg dhe më e gjata ishte tetë vjet burg.
Siç raporton Guardian, ky është një nga disa gjyqe që synojnë një lëvizje më të gjerë të ekstremit të djathtë, anëtarët e së cilës i përmbahen teorive të konspiracionit dhe refuzojnë legjitimitetin e shtetit modern gjerman.
Së bashku ata hartuan një plan për të rrëmbyer Ministrin e Shëndetësisë Karl Lauterbach, një figurë përbuzjeje për shumë kundërshtarë të kufizimeve të koronavirusit, dhe për të vrarë truprojat e tij nëse është e nevojshme.
Grupi u bashkua në janar 2022, duke planifikuar të krijonte me dhunë kushtet për një luftë civile në Gjermani dhe të merrte pushtetin shtetëror.
Plani i tyre përfshinte sabotimin dhe çaktivizimin e rrjetit të energjisë, një operacion që ata e quajtën “Nata e heshtur”.
Ata shpresonin se anëtarët e pakënaqur të forcave të sigurisë do të bashkoheshin me ta në kaosin që pasoi.
Mbështetësit e lëvizjes Reichsbürger pretendojnë se Perandoria Gjermane, e cila u shemb në 1918, ekziston ende.
