Për tri ditë në Kosovë kanë qenë aktive 294 zjarre. Dyshimet fillestare për secilën prej tyre janë që shkaktar është dora e njeriut.
Kështu ka njoftuar drejtori Ekzekutiv i Agjencisë së Menaxhimit Emergjent të MPB-së, Genc Metaj, në një konferencë për media.
“Vetëm javën e parë të marsit kemi pasur 57 raste të zjarreve, ndërkaq vetëm nga data 7 deri në datën 10 mars që nënkupton vikendin që lëmë pas, kanë qenë 294 raste të zjarreve. Prej tyre 75 kanë qenë malore, 156 kanë qenë fushore dhe 63 zjarre të tjera”, ka thënë ai, raporton RTKlive.
Sipas tij, zjarret aktive më serioze momentale janë në Drenas në fshatin Dobroshec, në Kamenicë në fshatin Kiriqev dhe në Malishevë në Drenoc.
“Shkaqet kryesisht janë dora e njeriut, vijnë nga faktori njeri. Ne, si agjencion kemi ndërmarrë veprimet e nevojshme, kemi ngritur gjendjen e gatishmërinë në nivel vendi dhe nga sot nisim patrullimet me zjarrfikësit”, ka thënë ai.
Metaj ka thënë se situata është jashtë normales, teksa ka bërë apel te qytetarët për bashkëpunim ndërinstitucional, në mënyrë të evitimit të zjarreve të tilla.
Ai ka thënë se aktualisht s’mund të bëhet vlerësim i dëmeve për shkak të procedurave.
