Angazhimi i OSBE-së në mbështetje të të gjitha komuniteteve që jetojnë në Kosovë është i jashtëzakonshëm, ka thënë Kryetari i Komunës së Vitisë, Sokol Haliti duke shtuar se OSBE ka kontribuar edhe në forcimin e paqes dhe sigurisë, si dhe në promovimin e dialogut dhe bashkëjetesës ndërmjet grupeve të ndryshme etnike dhe fetare që jetojnë në Kosovë.
Kështu ka deklaruar Haliti sot një takim të rëndësishëm që ka zhvilluar në zyrën Regjionale të Organizatës për Siguri dhe Bashkëpunim në Evropë (OSBE) në Gjilan, me Steve Dodds, Sekretarin e Dytë të Delegacionit të OSBE-së në Vjenë, dhe Melanie J.H. Scarlet, Shefen e Njësitit për Politika të Jashtme, Pajtim dhe Integrim në Ambasadën e Britanisë së Madhe në Kosovë. Pjesë e këtij takimi ishte edhe drejtori i kësaj zyre, Iglil Totozani, njofton Komuna e Vitisë.
Në këtë takim Haliti i ka njoftuar ata edhe për zhvillimet e gjithmbarshme në komunën e Vitisë, duke përmendur projektet e realizuara dhe ato që janë në fazë implementimi. Gjatë takimit, kryetari Haliti theksoi se komuna e Vitisë është një shembull i mirë i bashkëjetesës dhe se ka mundësi të mira për zhvillim ekonomik dhe social në rajon.
I pari i komunës po ashtu ka shprehur gatishmërinë për të vazhduar bashkëpunimin e mirë me OSBE-në dhe me Ambasadën e Britanisë së Madhe.
