Me qëllim që vizitorët të mos pengohen gjatë vizitës në Zonën Historike të Prizrenit, komuna është duke vendosur piston digjital për të penguar hyrjen dhe daljen e automjeteve të paautorizuara.
Projekti ka filluar dhe mendohet të përfundojë deri në fund të prillit.
Shefqet Hoti nga Prizreni e mban mend Urën e Arastës që nga vitet `80. Ai thotë se gjithmonë hyrjet e daljet edhe në atë kohë kanë qenë të kontrolluara në Zonën Historike të Prizrenit.
Intervenimiet në këtë objekt ai i quan normale, për një qytet që ka vizitorë të shumtë.
“Shumë me vend, sepse është zonë historike dhe vijnë shumë njerëz nga vende të ndryshme dhe duhet të shëtisin të lirë dhe mos të kenë pengesa me një fjalë nga makinat e tjera e tjera, vetëm ata që e kanë patjetër”, ka thënë Hoti për RTK.
Shumë vizitorë të Prizrenit thonë se nuk i pengojnë punimet që po bëhen, përkundrazi në Prizren ndihen shumë mirë.
“Ne këtu do të qëndrojmë një ditë dhe me pas do të nisemi për në Shqipëri punimet këtu që po bëhen nuk na penguan shëtisnim shumë lirshëm”, ka thënë një vizitor.
“Ky qytet me të vërtet ka diçka që më tërheq edhe pse unë kam lindur në Turqi këtu më pëlqen shumë të vij meqenëse kemi edhe familje këtu”, tha një vizitore.
“Këtu kemi ardhur jemi duke shëtitur qytetin edhe pak kohë do të jemi këtu dhe besojë që do të shohim edhe shumë gjëra të bukura”, është shprehur një vizitor tjetër.
Çelë Lamaj, drejtor i shërbimeve publike – Prizren, ka thënë se nuk do të ketë ndonjë problem në hyrje e dalje, do të pajisen me kartela të gjithë ata që banojnë në atë zonë, kurse deri në orën 9 do të lëshohet për lëvizje të lirë për furnitorët të cilët futen në Sheshin “Shatërvan”.
“Pistonat nuk do të vonojnë si kohë, besoj këtë javë apo javën tjetër, por ne e dimë që do të intervenohet edhe në Urën e Arastës, ku do të hiqet ai kalldërm dhe do të vazhdohet me kalldrëmin e ri, presim që nga muaji prill të na përfundoj ky projekt”, ka thënë Lamaj.
Meqë Ura e Arastës futet në objektet e rëndësishme të Zonës Historike, Lamaj thotë se i kanë siguruar komplet lejet për këtë zonë nga QRTK.
